مراجعة مسلسل سوبرانوس The Sopranos

نستعرض لحضراتكم فى هذه المقالة مراجعة المسلسل الشهير مسلسل سوبرانو
أزيك يا صديقي؟ اتمني تكون بخير وسط احداث الالفية التالتة .
تعالي نرجع كده بالظبط 15 سنة (10 يونيو 2007) ، التاريخ ده انتهي فيه واحد من أفضل اللي اتعرض علي الشاشة الصغير أن مكنش …. أيوة قبل ما اكمل ممكن يكون افضلهم _ انا هطول فالمراجعة فحاول تسمعني للاخر _ اليوم ده اتعرض فيه ” Made in amercia ” الحلقة الاخيرة من [ the sopranos ] حوالي تقريبا ١١.٩ مليون واحد فامريكا كان بيتفرج عليها وقت عرضها فالتيليفزيون . مكنتش لسه انتشرت الاستريمنج بلاتفورمز ولا السمارت فون كان بالمناسبة يوم ٩ يونيو أول إصدار للايفون .

فحبيت أديك أنطباع عن الحقبة والتاريخ واسيبك تتخيل معايا المسلسل الثوري اللي قدمهولنا David Chas مش حابب أطول فالحتة ديه كتير لأن ناس كتير بتحصر المسلسل فالجانب ده بس بس اديتك فكرة .

نكلم جد؟ أنا مقيم التجربة ديه ب 10/10 فكل الجوانب أنا كنت متسرع لما كنت بقول المسلسل اللي مقومه كاريزما وتمثيل جيمس جاندولفيني ( توني ) بس بعد كل سيزون كنت بكتشف جمال وعمق الأحداث ، توني سوبرانوس زعيم المافيا اللي بيحس بذنب ومش عارف يتصرف مع خواطره كأنسان وساعات عاوز يطلع من كل ده بس هو عارف وأي حد عارف الدخول للمافيا مش هتخرج منها غير وانت ميت او فالسجن ، فنروح ونجرب العلاج النفسي الموضة الجديدة ديه اللي بتاعت الناس الضعفاء وده حرفيا تشبيه لوصفه فالمسلسل وكانت من اجمل الحجات اللي استوحها تشيس من حياته ايوة [ وبالناسبة د.لورين كوفمان ساعدت فتطوير شخصية د ميلفي طول ال٦ مواسم ] واللي ساعدته كمان فتطوير الشخصيات و رسم طبيعة كل شخصية اجرامية وازاي ممكن يتصرف فالمستقبل استاندًا علي داتا عندها وده اتكلم عنه تشيس.
هو كان عنده مشاكل بردو مع امه وعكسها علي شخصية توني وخلاهها شبهها بس فالعالم بتاعه زعيم المافيا اللي طفولته كانت قاسية مش بسبب مهنة أبوه وأنه من المافيا ، لأ ده امه اللي كانت بتكرهه وكانت سيئة فمعاملتها معاه وتعيسة وبتكأبه طول الوقت .

أنه يخلي توني زعيم المافيا يخش لدكتور ميلفي ويكشف شخصيته ساعات بعبارات تحسها تهكم و عصبية بس كانت بتكشفه . وتاثير اللي حواليه من امه لعمه لخوفه علي اسرته لجشعه لحبه للتخفي بجو المريض النفسي ده حاجة عظيمة جدا وكانت من اسباب تضخم الجانب الاجرامي والنفسي ليه خلاص انا بتعالج وبغلط وبتعالج والمسلسل عرض تعبيرات الشخص المجرم وازاي ممكن يستغل وضع المرض ويبين انه مظلوم .

فانت قدام بناء شخصيات ولا اروع كله واخد مساحته من تمثيل وتطور شخصيات . احداث تحسها فعلا حقيقية من الشارع الامريكي اللي احنا مكناش عارفيين عنه حاجة زي حاليا وطريقة القتل ومشاهد العنف كانت فعلا مميزة ، وتعامل توني ( الراجل الابيض) مع احداث جديدة فالجتمع هناك سود و مسلميين وكان ساعتها حرب العراق وافغانستان فكان كلامهم كله تقريبا من جوا المطبخ أيوة ده كان بيحصل فعلا
كاريزما للممثليين المساعديين كبيرة ساهمت بردو فنجاح ده عندك كريستوفر ابن توني البار اللي فضل مساعده وواقف جمبه لحد ما خلاه كابتن فالعصابة ، بولي صاحب أبوه والراجل الخبرة واللي كان طالع بطابع كوميدي جامد، سيل دراع توني اليمين ومستشاره ، بوبي اللي أترقي من سواق لجوز اخته وشخصية بريئة بس مع الوقت بتتلوث ، كارم زوجه زعيم العصابة وأكتر حد بيقف جمبه وشفنا مدي مشاعرها علي مدار ٦ مواسم من حب لكره لتعود لعودة لحب ومسانده ليه ، ميدو سوبرانو بنته اللي كانت بتكرهه وبتقرف منه بس خلاص كبرت وفهمت ان ده امر واقع وبقت منهم او نسخة تقدم حب شبيه بكارم ، آي جي (ابن امه) الطفل المدلل اللي الزعيم بيستعر من ضعفه وفشله علي مدار ٦ مواسم ومواقف عميقة تكشف اختلاف ثقافات الاب والابن وصعوبة التواصل فزمن حتي مكنتش فيه معوقات قد حاليا .

كل دول أدوا ادوارهم بشكل أضاف للمسلسل جامد وكان تركيب الشخصية معاهم بيندمج فشخصياتهم الواقعية اكتر فاكتر لحد ما تحس انه فعلا دول مش ممثليين وشوف اي ريفيو لمقابلتهم هتتصدم من الكيمياء اللي بينهم كلهم .

الاكشن فالمسلسل مش الغرض الاساسي يصديقي لان انا كذا حد معترض علي الموضوع ده وبيقول فين مشاهد الاكشن اللي بتبقي فاي مسلسل عصابات ، مع اني كنت مستمتع جدا بمشاهد الاكشن وطرق القتل البشعة اللي كانت معمولة علي اكمل وجه بس مش ده الغرض اللي احنا جاينله شوف البوستر هتلاقي مكتوب family redefine فاظن الاعتراض علي حتت الدراما اكتر من الاكشن ، إدعاء غريب شوية لأن أصلا موجود وأصلا مش ده اللي شيس جاي يكلمك عليه فالمسلسل
هو جاي بيكلمك عن طبيعة المجرم وتحليله ودوافعه البشرية .

عاوز أكلم كمان عن المزيكا اللي أختارها كلها ديفيد شيس من اختياره ، كانت جامدة جدا ومتوظفة بذكاء كافي يضيفلك متعة سمعية مع اندماجك فالاحداث وكفاية الانترو لوحده اللي بتتفاعل معاه نفسيا قبل كل حلقة انترو ذكي وطريقة تصويره عظيمة فعلا .

اللي معجبنيش اوي وبصراحة كمية المط الزيادة الموجود زيادة عن اي مسلسل أنا وأنت شفناه وأنا هقولك ده ليه ، عامة انت فاكر الحقبة بتاعته واللي كلمتك عليه فوق ؟ اهو بقي شركات الانتاج زمان كانت بتحلب فالمسلسل قد الامكان مدام ناجح ومشهور وده ميعبش المسلسل اكتر ما ممكن يعيب الزمن اللي بنتنتقده منه وركز معايا فالجملة ديه.

هو كان المط فالسيزون الرابع وبداية ال٦ بس غير كده كله هتحس انك تمام معاه جدا .

وهو مسلسل طويل عامة ومعمول بطريقة تخليه يعيش لاجيال كمان وانا فهمت جملة بتتقال عليه أنه أبو المسلسلات وكنت بستغربها بس بعد ما شفته لأ ده فعلا واقع وده بدا new wave خلت الناس تشوف الدراما التيليفزيونية من جانب اخر مش كله متجه للسينما انها افضل ومساحتها فالحرية افضل ، بعد المسلسل الانظار اتجهتك ازاي نمشي زي سوبرانوس ، فانت قدام عمل بنظرتي المتواضعة متكامل بالنسبة انه البداية .

وبس كده طولت عليك واحب اسمع رائيك سواء بالسلب او الإيجاب عن اي حاجة فالمسلسل .